கீதையில் சில சொற்றொடர்கள் - 48

ॐ

கீதையில் சில சொற்றொடர்கள் - 48

नव द्वारे पुरे देही ... (अध्याय ५ - श्लोक १३)
நவ த்வாரே புரே தேஹீ ... (அத்யாயம் 5 - ஶ்லோகம் 13)
Nawadwaare Pure Dehee ... (Chapter 5 - Shlokam 13)

அர்தம் :  ஒன்பது வாஸல்கள் கொண்ட நகரத்தில் தேஹீ ...

ஹிந்து தர்ம க்ரந்தங்களில் காணப்படும் அழகானதொரு உவமைகளில் இதுவும் ஒன்று .  நம் ஶரீரமே இங்கு ஒன்பது வாசல்கள் கொண்ட நகரமாக வர்ணிக்கப் படுகிறது .  அதற்கு ஒன்பது த்வாரங்கள் உண்டு .  இங்கு அவையே வாசல்கள் எனப்படுகின்றன .  இந்த வாசல்கள் வெளியே , உலகத்தை நோக்கித் திறந்திடுபவை .  "ஸ்வ" அல்லது ஜீவன் இவ்வாசல்கள் வழியே வெளியே ஸம்ஸாரத்தில் ஸஞ்சரிக்கின்றது .  அத்வாரத்துடன் தன்னைப் பிணைத்துக் கொண்டு , அத்வாரமாகவே தன்னைக் கருதி , ஸம்ஸார விஷயங்களுடன் உறவாடி , போகங்களை அநுபவிக்கிறது . நவ த்வாரங்கள் கொண்ட இந்த நகரம் தேஹம் என்றும் அறியப்படுகிறது .

ஸ்வ அல்லது ஜீவனே இங்கு தேஹீ என்று அழைக்கப்பட்டிருக்கிறது .  ஒன்பது த்வாரங்கள் கொண்ட நகரத்தில் , தேஹத்தில் வஸிப்பவராக வர்ணிக்கப் பட்டிருக்கிறது .  தேஹம் - தேஹீ என்ற  இந்த வார்தை ப்ரயோகம் "தேஹம் வேறு . அதில் வாஸம் செய்திடும் தேஹீ வேறு என்ற கருத்தை வெகு ஸஹஜமாக ப்ரகடனப் படுத்துகிறது .  அது நிவாஸம் , இது அங்கு வஸித்திடுவது .  அது ஜடம் . இது ஜீவன் .  ஒரு ஜட அமைப்பில் வஸிப்பவன் தன்னை அத்துடன் பிணைத்துக் கொள்வதும் , தன்னையே அதுவாகக் கருதி ஐக்யப் படுத்திக் கொள்வதும் இயற்கை .  அவ்வாறு தன்னை ஜடத்துடன் பிணைத்துக் கொண்டவன் அந்த ஜட அமைப்பில் விகாரம் , தேய்மானம் , அழிவு  ஏற்படும் போது தானே அழிந்து விட்டதாகக் கருதி வருந்துவதும் இயற்கை .  இது மணல் , ஸிமெண்ட் , செங்கலால் கட்டப்படும் அமைப்பிற்கும் பொருந்தும் .  தன்னை ஜட அமைப்பில் இருந்து விலக்கிக் கொள்ளப் பயில்பவன் , தான் வேறு , தான் வஸித்திடும் ஜட அமைப்பு வேறு என்று அறிந்திருப்பவன்  அமைப்பில் அழிவைக் கண்டும் அமைதியை இழப்பதில்லை .  தடுமாறுவதில்லை .  ஜட அமைப்பில் , தன் வீட்டில் காணப்படும் விகாரங்களை , அழிவை சரி செய்ய அவன் முற்படலாம் .  அமைப்பு நல்ல நிலையில் இருந்திட முயற்சிகள் எடுக்கலாம் .  ஆனால் , அவனது இம்முயற்சிகள் அமைப்பில் இருந்து விலகி நின்று , நான் வேறு இந்த ஜடம் வேறு , நான் இது இல்லை, நான் இதில் வஸிப்பவன் மாத்ரமே , என்ற தெளிவான புரிதலுடன் செய்யப்படுபவை .