கீதையில் சில சொற்றொடர்கள் - 54

ॐ

கீதையில் சில சொற்றொடர்கள் - 54

अनाश्रितः कर्म फलम  ।  (अध्याय ६ - श्लोक १) 

அனாஶ்ரிதஹ கர்ம ஃபலம்  ...  (அத்யாயம் 6 - ஶ்லோகம் 1)

Anaashritah Karma Phalam  ... (Chapter 6 - Shlokam 1)

அர்தம்  :  கர்ம ஃபலனை ஸார்ந்திராமல்  ...

அனாஶ்ரிதஹ கர்ம ஃபலம்  ...  கர்ம ஃபலனை ஸார்ந்திராமல்  ... இந்த ஶப்தாவலீயைப் பார்த்த உடன் இதற்கு பிற்பகுதி உண்டு என்பது புலனாகிறது .  ஆம் .  உண்டு .  கார்யம் கர்ம கரோதி யஹ  ... ஸ ஸந்ந்யாஸீ ...  எவர் கர்மங்களைச்  செய்கிறாரோ  .. அவர் ஸந்ந்யாஸீ .

கீதையில் ஸ்ரீ க்ருஷ்ணனால் மீண்டும் மீண்டும் வலியுறுத்தப்பட்டக் கருத்து இது .  பகவத் கீதையின் ஸாரம் இதுவே என்று சொன்னாலும் மிகையாகாது .

இது கடினமானது என்பதில் ஸந்தேஹம் இல்லை .  ஆனால் , இது தான் ஸத்யம் .  இது நடைமுறைக்கு இயலாதது என்பதால் கடினம் இல்லை .  நாம் பலஹீனமானவர்கள் என்பதால் கடினம் ..  நம்மை இதற்கேற்ற வகையில் தயார் செய்து கொள்ள மூன்று நிலைகள் உண்டு .  (1) ...  கர்மஃபலனைப் பற்றிய சிந்தனை கார்யத்தை பாதிக்கிறது என்பதைப் புரிந்து கொள்ள வேண்டும் .  இது புத்தி ரீதியான முயற்சி .  (2) ...  திட்டமிட்டு , முறையானப் பயிற்சிகள் செய்ய வேண்டும் .  (3) ...  இது ஶ்ரத்தையாகப் பரிணமித்து நம்முள் ஆழமாகப் பதிந்திட வேண்டும் .  இந்த ஸத்யம் நம் அந்தராத்மாவால் உணரப்பட வேண்டும் .  முதல் ரெண்டு நிலைகளால் மூன்றாவது நிலை தன்னால் விளைந்திடும் .

கர்ம ஃபலனைப் பற்றிய சிந்தனை கர்மத்தின் மீது எத்தகை பாதிப்பு ஏற்படுத்திடும் ?  கார்யம் மெதுவாகி விடும் .  கார்யத்திறன் குறைந்து விடும் .  கார்யம் கெட்டு விடும் அல்லது நின்று விடும் .  ஸில உதாஹரணங்கள் மூலம் புரிந்து கொள்ள முயல்வோம் .

குழந்தையை சீராட்டிப் பாராட்டி வளர்த்தல் பெற்றோரின் கடமை ஆகும் .  குழந்தை நல்லபடி வளர்தல் , நன்கு படித்து உயர்ந்த பதவியில் அமர்ந்து கை நிறைய ஸம்பாதித்தல் , தாய் தந்தையரைக் காப்பாற்றுதல் ... இவை அனைத்தும் இக்கடமையின் கர்ம ஃபலன்கள் .  கடமையைச் செய்து கொண்டிருக்கும் போது , ஃபலனைப் பற்றிய சிந்தனை வந்தால் என்ன ஆகும் .?  தாய் தொட்டிலை ஆட்டியபடி தாலாட்டு பாடிக் கொண்டிருக்கும் போது , ஃபலனின் சிந்தனை அவளுள் முளைத்தால் , தொட்டிலை ஆட்டும் கரங்கள் நின்று விடும் .  தாலாட்டுப் பாடிடும் வாய் மூடி மௌனமாகி விடும் .  குழந்தை பால் அருந்திக் கொண்டிருக்கும் போது இத்தகைச் சிந்தனை வந்தால் , குழந்தையின் வாய் முலையை விட்டு அகன்றதையும் அறியாமல் இருப்பாள் .  பால் கிடைக்காத குழந்தை , கத்தி அழுது அவளது நினைவை மீட்க வேண்டி வரும் .

மாணவன் கற்கிறான் .  படித்தும் எழுதியும் பயிற்சிகள் செய்கிறான் .  மன:பாடம் செய்கிறான் .  புரிந்து கொள்ள முயல்கிறான் .  இவை அனைத்தும் வித்யா என்ற அவனது கடமையில்  கர்மங்கள் .  பரீக்ஷையை நன்கு எழுதுதல் , அதிக மதிப்பெண்கள் எடுத்தல் ,  நல்ல கல்லூரியில் சேர்ந்து உயர்ப் படிப்பைப் பெறுதல் , கை நிறைய ஸம்பளத்துடன் நல்ல வேலையில் சேருதல் ... இவை அனைத்தும் மாணவனின் கர்ம - ஃபலன்கள் .  அவன் கர்ம ஃபலனை ஸார்ந்திருந்து கர்மங்களை செய்தால் என்ன ஆகும் ?  கர்மங்களைச் செய்திடும் அந்த க்ஷணத்தில் கர்ம ஃபலனைப் பற்றி சிந்தித்தால் , கவலை கொண்டால்  என்ன ஆகும் ?  (இதைச் சிந்தித்தல் என்று கூறுவது ஸரியா ?  சிந்தித்தலில் ஸ்வய நினைவு உயிருடன் இருந்திடும் .  இதைக் கனவில் மூழ்குதல் எனலாம் .  ஸ்வய நினைவு அற்ற நிலை அது .)  கர்ம ஃபலனைப் பற்றிய சிந்தனை அல்லது கனவு அவனது கண்களைப் புஸ்தகத்தில் இருந்து அகற்றி விடும் .  அப்யாஸம் என்ற அவனது கர்மம் நிறுத்தப்படும் .

ப்ரியமானவர் கடும் நோயால் பாதிக்கப் பட்டுள்ளார் .  அவரது ஸேவை ஸுஶ்ருஷையில் ஈடுபட்டிருக்கிறார் இவர் .  இது இவருக்குக் கர்மம் .  நோய் குணமாகி  நோயுற்றவர் ஸஹஜ வாழ்க்கைக்குத் திரும்ப வேண்டும் .  அல்லது மரிக்க வேண்டும் .  இவையே ஸுஶ்ருஷை செய்பவருக்குக் கர்ம ஃபலன்கள் .  எது கிடைத்தாலும் அவருக்கு நிம்மதியே .  அவரால் தன் ஸஹஜ வாழ்க்கைக்குத் திரும்பி ஸ்வந்தக் கனவுகளைத் துரத்தி ஓட முடியும் .  ஆனால் , அவர் இத்தகைய கர்ம ஃபலன்களை ஸார்ந்திருந்தால் உள்ளத்தில் சிடுசிடுப்புத் தோன்றி பதட்ட நிலையை அடைவார் .  நோயாளிக்கு ஸேவை ஸுஶ்ருஷை என்ற அவரது கார்யம் பாதிக்கும் .

இந்த திஶையில் நாம் செய்யக்கூடிய பயிற்சி என்ன ?  கண்ணுக்கு எட்டிய தூரம் வரை எந்த ஃபலனும் தென்படாத ஏதேனும் ஒரு கார்யம் நம் தினஸரி வாழ்க்கையின் அங்கம் ஆக வேண்டும் .  துலஸீ செடிக்குத் தண்ணீர் ஊற்றுதல் ;  அறிமுகம் இல்லாத அந்யனுக்கு தத்க்ஷணம் தேவைப்படும் உதவியைச் செய்து விட்டு மறந்து விடுதல் ,  பொது இடத்தில் பலருடன் இணைந்து மரம் வளர்ப்பு , கோவில் ஶுத்தம் செய்தல் ; குளம் தூர் வருதல்  போன்ற கார்யத்தில் ஈடுபடுதல் ;  தன்னுடைய அடையாளத்தை அழித்து ஒரு பெரும் அமைப்பில் இணைந்து விடுதல் ;  பஜனை , ஸத்ஸங்கம் போன்றவற்றில் சேர்ந்து பங்கெடுத்தல் ;  ப்ராஹ்மணனுக்கு விதிக்கப்பட்ட த்ரிகால ஸந்த்யா வந்தனம் இத்திஶையில் மிகச்சிறந்த ப்ரயோகம் .   கோஸேவை , ஸூர்யனுக்கு அர்க்யம் விடுதல் போன்றவையும் நல்ல முயற்சி .  முயற்சி எதுவானாலும் , அது திட்டமிட்ட , சீரான முயற்சியாக இருக்க வேண்டும் ..  இடையறாது செய்யப் பட வேண்டும் .  நெடுந்தூரம் வரை எவ்வகை ஃபலனும் கிடைப்பதற்கான வாய்ப்பு தெரியக் கூடாது .

இவ்வாறு செய்யப்படும் இடையறாத முயற்சியின் விளைவாக தன்னுள் ஆழத்தில் , உறுதியாக ஶ்ரத்தைப் பதிந்திடும் .  அதன் பின் ?  ஆனந்தமே .  நாளையைப் பற்றிக் கவலைப் படாமல் , ஃபலன்களை ஸார்ந்திராமல் ,   தத் க்ஷணத்தில் வாழ்ந்திடும் ஆனந்தம் .  கர்மம் செய்வதில் மாத்ரம் லயித்திடும் ஆனந்தம் ..  அதாவது ..  அனாஶ்ரிதஹ கர்ம ஃபலம்  .... கார்யங்களைச் செய்வதன் ஆனந்தம் ..கிடைத்திடும்  இந்த ஆனந்தம் கர்ம ஃபலன் இல்லை .  இது நம் ஸத்ய ஸ்வரூபம் .