கீதையில் சில சொற்றொடர்கள் - 33

ॐ

கீதையில் சில சொற்றொடர்கள் - 33

कर्मण्यकर्म यः पश्येद् अकर्मणि च कर्म यः  स बुद्धिमान् मनुष्यः |  (अध्याय ४ - श्लोक १८)
கர்மண்யகர்ம யஹ் பஶ்யேத் அகர்மணி ச கர்ம யஹ் ஸ புத்திமான் மனுஷ்யஹ்  ...(அத்யாயம் 4 - ஶ்லோகம் 18)
Karmanyakarma Yah Pashyed Akarmani cha Karma yah Sa Buddhimaan Manushyah ... (Chapter 4 - Shlokam 18)

அர்தம் :  கர்மத்தில் அகர்மத்தையும் அகர்மத்தில் கர்மத்தையும் காண்பவனே புத்திஶாலி..

கர்மம், அகர்மம் பற்றி இதற்கு முந்தைய குறிப்பில் சிந்தனை செய்திருக்கிறோம் அல்லவா..  எனவே, இந்த சொற்றொடரில் வேறெதையேனும் காண முயல்வோம் வாருங்கள்.. அப்பால் நோக்கிடச் சொல்கிறது கீதையின் இந்தச் சொற்றொடர். அப்பால் நோக்குதலின் மஹத்வத்தினைச் சொல்கிறது. ஐம்புலன்களால் அறியக்கூடியதற்கு அப்பால்..  நம் புத்தியினால் க்ரஹிக்கக் கூடியதற்கு அப்பால்...  தத் க்ஷணத்திற்கு அப்பால்.. நமக்குப் பழகிய நமது குறுகிய சிந்தனை ஓட்டத்திற்கு அப்பால்.. அப்பால் நோக்குதல் ஒரு சிறப்பான பழக்கம் அல்லது தன்மை. (பயிற்சியினால் உருவாவது பழக்கம்.  ஜன்மத்தின் போது நம்முடன் வருவது தன்மை.)  பரமனின் திட்டப்படியோ அல்லது விதியின் நிர்ணயத்திலோ எல்லாம் நடக்கும் என்று கருதுபவர்கள் தன்மை அல்லது ஸ்வபாவம் என்று அழைத்துக் கொள்ளுங்கள். ஸ்வய நிர்ணயம் அல்லது என் கையில்தான் எல்லாம் என்று கருதுபவர்கள் பழக்கம் என்று கொள்ளுங்கள்.

பாரம்பர்யமான வழிமுறைகள் மற்றும் இந்நாள் வரை அவர் பின்பற்றிய வழிமுறைகளுக்கு அப்பால் யோஜித்திடும் வ்யாபாரி, தன் வ்யாபாரத்தை மற்றத் துறைகளிலும் மற்ற ப்ரதேஶங்களிலும் விஸ்தரிக்கிறான்.  இயற்கையை நுட்பமாக கவனித்திடும் மாணவன் கண்களுக்கு நிதர்ஶனமாகத் தெரியக் கூடியதற்கு அப்பால் நோக்கினால் ஆழங்களை அடைகிறான்.  இயற்கையின் ரஹஸ்யங்களைக் காண்கிறான்.  விக்ஞானியாக மலர்கிறான்.  விக்ஞானத் துறையில் பெரும் பங்கு செலுத்துகிறான்.  ஒரு ஸமூஹ ஆர்வலர் வடிக்கப் பட்ட பாதைக்கு அப்பால் சிந்தித்தால் புரட்சியாளன் ஆகிறான்.  ஒரு யுக புருஷன் ஆகிறான்.  காணும் காக்ஷீ,, கேட்ட ஶப்தம்,  படித்த வார்த்தைக்கு அப்பால் நோக்குபவன் ஓவியனாக, ஸங்கீதக் கலைஞனாக,  ஸாஹித்ய கர்தாவாக மலர்கிறான்.  தத்காலத்தைத் தாண்டி, தற்போதைய தலைமுறையைத் தாண்டி நோக்குபவன் ர்ஷீ ஆகிறான்.  ஸ்தூலமான இந்தப் படைப்பிற்கு அப்பால் நோக்குபவன் பரமனுடன் ஒன்றுகிறான்.

அப்பால் நோக்குதல் குழப்பங்களைத் தகர்த்து, தெளிவான முடிவு எடுப்பதில் நமக்குத் துணை புரிகிறது.  அப்பால் நோக்குதல் நம்மை ஸமத்வம் உள்ளவனாக, பாரபக்ஷம் அற்றவனாக மாற்றுகிறது.  அப்பால் நோக்குதல் நம்முள் மண்டிக் கிடக்கும் பகை என்ற களையைக் களைந்து  நம்முள் க்ஷமா அல்லது மன்னிக்கும் தன்மையை வளர்த்து விடுகிறது..  அப்பால் நோக்குதல்  நம்முள் தழைத்திடும் பயத்தைக் கொன்று சூழ்நிலைகளை வெற்றி கொள்ளும் ஸாமர்த்யத்தை  வளர்த்து விடுகிறது.

அப்பால் நோக்குவோம்.  குறைந்த பக்ஷம் அப்பால் நோக்க முயலுவோம்.  எதையேனும் காணலாம்  காண முடியாமல் போகலாம்.   அப்பால் நோக்குதல் என்ற முயற்சி தன்னில் ஒரு சிறப்பான முயற்சி..